Eyjólfsstaðaskógur varð Opinn skógur árið 2004.

Eyjólfsstaðaskógur á Völlum er í alfaraleið og tilvalinn útivistar- og áningarstaður. Þar eru góðir göngustígar, rjóður með bekkjum og borðum og grill.

Lýsing
Skógræktarfélag Austurlands keypti Eyjólfsstaðaskóg árið 1944. Eyðibýlið Einarsstaðir, neðan við skóginn innan Kaldár, fylgdi með í kaupunum. Um 1970 var lagður vegur að skóginum upp að Kaldá, þegar Alþýðusamband Austurlands keypti Einarsstaði af skógræktarfélaginu og reisti þar orlofsbústaði. Kaldá var brúuð 1986 og fyrsti skógarvegurinn var lagður í framhaldi af því.

Skógrækt
Eyjólfsstaðaskógur er 172 ha að flatarmáli og nær upp í um 250 m h.y.s. Skógurinn er að mestu vaxinn birki. Barrviðir voru fyrst gróðursettir 1949, en aðallega á árunum 1957-1974, mest grenitegundir, sem vaxa eins og best gerist á Íslandi.

Skógræktarfélag Austurlands
Skógræktarfélag Austurlands var stofnað árið 1938. Starfssvæði félagsins er Eyjólfsstaðaskógur. Þar rekur félagið félagsheimilið Blöndalsbúð, sem einnig er leigt út fyrir fundi og til gistingar fyrir félagsmenn skógræktarfélaga.

Gefinn var út vandaður bæklingur með helstu upplýsingum um svæðið, ásamt myndum og korti. Bæklinginn má nálgast hér (.pdf).
Kort af svæðinu má skoða hér (.pdf).