Skrifstofa Skógræktarfélags Íslands verður lokuð frá fimmtudegi 31. ágúst til mánudags 4. september vegna aðalfundar félagsins, sem haldinn er á Patreksfirði 1. til 3. september. Við mætum aftur hress og kát á skrifstofuna þriðjudaginn 5. september.
Aðalfundur Skógræktarfélags Íslands 2023 verður haldinn á Patreksfirði dagana 1-3. september og eru þrjú skógræktarfélög sem eru sameiginlega gestgjafar fundarins að þessu sinni – Skógræktarfélag Bíldudals, Skógræktarfélag Patreksfjarðar og Skógræktarfélag Tálknafjarðar.
Forseti Íslands, Guðni Th. Jóhannesson mun flytja ávarp við setningu fundarins, þar sem honum verður fært fyrsta eintak af nýrri bók – Frændur fagna skógi – er fjallar um skógartengd samskipti Norðmanna og Íslendinga. Af því tilefni mun Tønnes Svanes, sendifulltrúi Norska sendiráðsins einnig flytja ávarp.
Auk hefðbundinna aðalfundarstarfa verða flutt fjölbreytt fræðsluerindi og farið í vettvangsferðir til að skoða skóglendi og annað áhugavert á svæðinu. Fræðsluerindin munu meðal annars fjalla um framgang birkis á Vestfjörðum, plöntusteingervinga í Surtarbrandsgili, skógrækt í Vestur-Botni og merkistré í Barðastrandarsýslu.
Hápunktur fundarins er hátíðarkvöldverður á laugardagskvöld þar sem skógræktarfólk verður heiðrað fyrir framlag sitt til skógræktar og dans stiginn fram á nótt.
Dagskrá aðalfundar, starfsskýrsla Skógræktarfélags Íslands og aðrar upplýsingar verða aðgengilegar á heimasíðu Skógræktarfélags Íslands:
https://www.skog.is/adalfundur-2023/
Hægt verður að fylgjast með gangi fundarins á Facebook- og Instagram síðum Skógræktarfélags Íslands:
Garðyrkjuskólinn á Reykjum býður upp á ýmis áhugaverð námskeið sem nýst geta ræktunarfólki, m.a. um skógavistfræði, undirbúning fyrir landgræðslu og skógrækt, útinám og áhættumat trjáa.
Nánari upplýsingar um námskeiðin má finna á heimasíðunni: https://www.fsu.is/is/namid/gardyrkjuskolinn-reykjum/gardyrkjuskolinn-namskeid
Skrifstofa Skógræktarfélags Íslands verður lokuð eftir hádegi miðvikudaginn 9. ágúst.
Garðyrkjuskólinn á Reykjum er með tvö námskeið nú í september, sem áhugaverð eru fyrir ræktunarfólk.
Annars vegar er um námskeið að ræða er heitir Áhættumat trjáa. Með hlýnandi veðri og hækkandi trjágróðri í þéttbýli er orðið mikilvægt að geta lagt mat á ástand trjáa og möguleg hættumerki. Námskeiðið er bæði bóklegt og verklegt.
Hins vegar er námskeið er heitir Í upphafi skyldi endinn skoða og er í því farið yfir helstu þætti sem mikilvægt er að horfa til frá byrjun þegar farið er í landgræðslu og/eða skógrækt, til að tryggja árangur til framtíðar.
Grænni skógar I er námskeiðaröð sem ætluð er skógræktendum og öðrum skógareigendum sem vilja auka við þekkingu sína og árangur í skógrækt.
Námskeiðaröðin tekur fimm annir og þátttakendur taka alls 15 námskeið á þeim tíma eða að jafnaði 3 á hverri önn. Fyrsta námskeiðið verður haldið í Garðyrkjuskólanum á Reykjum í Ölfusi dagana 22. og 23. september 2023.
Hvert námskeið er skipulagt þannig að kennt er á föstudegi kl. 16-19 og laugardag kl. 9-16. Námskeiðin eru byggð upp sem blanda af fyrirlestrum, verklegum æfingum og vettvangs- heimsóknum. Að auki verður farið í námsferð innanlands og verður hún kynnt sérstaklega.
Nánari upplýsingar veitir Björgvin Örn Eggertsson, verkefnisstjóri Grænni skóga, í síma 616 0828 eða með tölvupósti á netfangið boe@fsu.is.
Í tengslum við Líf í lundi er boðað til ljósmyndasamkeppni. Taktu þín bestu mynd af atburðum á Líf í lundi eða bara í morgungöngunni í skóginum og merktu (taggaðu) Líf í lundi á Instagram eða Facebook með myllumerkinu #lifilundi.
Senda má inn myndir teknar dagana 23.-26. Júní. Dómnefnd mun velja bestu myndirnar og vera í sambandi við ljósmyndara. Myndirnar verða svo settar inn á Facebook-síðu Lífs í lundi og opnað fyrir atkvæðagreiðslu. Sú mynd er hlýtur flest „Like“ eða viðbrögð vinnur. Verðlaun eru veitt fyrir þrjú efstu sætin.
Spennandi verðlaun í boði!
Nánari upplýsingar um viðburði Líf í lundi má finna á Skógargátt vefsíðunni og Facebook síðu Líf í lundi.
Líf í lundi er útivistar- og fjölskyldudagur í skógum landsins í kringum Jónsmessuna og verður hann nú haldinn í sjötta sinn. Er markmið hans að fá fólk til að heimsækja skóga landsins, stunda hreyfing, samveru og upplifa skóga og náttúru. Flestir viðburðir eru á laugardeginum 24. júní, en viðburðir eru í gangi frá föstudegi til mánudags.
Nánari upplýsingar um dagskrá má finna á Skógargátt vefsíðunni og Facebook síðu Líf í lundi.
Fyrra tölublað Skógræktarritsins 2023 er komið út. Að venju er að finna í ritinu greinar um hinar margvíslegu hliðar skóga og skógræktar. Að þessu sinni eru í ritinu meðal annars greinar um aldarfriðun Þórsmerkur- og Goðalandsskóga, evrópuask, Hekluskóga, könnun á gæðum viðar, nýja bók um skógartengd samskipti Noregs og Íslands, skógarreit í Úlfarsárdal og birki hér á landi.
Kápu ritsins prýðir myndin „Innri friður“ eftir Ernu Kristjánsdóttur.
Skógræktarritið (áður Ársrit Skógræktarfélags Íslands) er eina tímaritið um skógrækt á Íslandi og aðalvettvangur skrifa íslenskra skógfræðinga og annarra sem áhuga hafa á hinum ýmsu hliðum skógræktar. Efni ritsins er því mjög fjölbreytt og víðtækt.
Áskriftartilboð – nýir áskrifendur fá tvö hefti að gjöf! Sjá nánar: https://www.skog.is/skograektarritid/
Vegna útivinnu og sumarleyfa verður gloppótt viðvera á skrifstofu félagsins dagana 7. – 9. júní. Vinsamlegast hringið á undan ykkur. Símanúmer starfsmanna má finna hér á heimasíðunni.
Nýlegar athugasemdir