Fréttir

Fyrra tölublað Skógræktarritsins 2021 er nú komið út og í póst til áskrifenda. Að venju má finna í ritinu greinar um hinar ýmsu hliðar skóga. Að þessu sinni eru meðal annars greinar um notkun aspargræðlinga í skógrækt, hæstu eikur á Íslandi, mismunandi tegundablöndur í skógrækt, skógrækt í Skálholti, skóga sem kolefnisforðabúr, mannfræðilega úttekt á skógræktarfélögunum, kynslóðaskipti í skógum, skógrækt á Reyðarfirði og hina yfirnáttúrulegu hliðar skóganna, auk viðtals – og minningargreina.

Kápu ritsins prýðir að þessu sinni myndin „Gróður jarðar“ eftir Tolla.

Skógræktarritið (áður Ársrit Skógræktarfélags Íslands) er eina tímaritið um skógrækt á Íslandi og aðalvettvangur skrifa íslenskra skógfræðinga og annarra sem áhuga hafa á hinum ýmsu hliðum skógræktar. Efni ritsins er því mjög fjölbreytt og víðtækt.

Hægt er að gerast áskrifandi að ritinu – sjá nánar: http://www.skog.is/skograektarritid/

Aðalfundur Skógræktarfélags Kópavogs verður haldinn fimmtudaginn 27. maí. Fundurinn hefst kl. 17:30 og verður í Guðmundarlundi að Leiðarenda 3, 203 Kópavogi.

Nánari upplýsingar um fundinn má finna á heimasíðu Skógræktarfélags Kópavogs.

Aðalfundur Skógræktarfélag Mosfellsbæjar verður haldinn þriðjudaginn 18. maí kl. 20:00 í sal Björgunarsveitarinnar Kyndils í Mosfellsbæ, Völuteigi 23.

Dagskrá:

1. Kosning fundarstjóra og fundarritara
2. Skýrsla stjórnar 2020
3. Reikningar félagsins 2020
4. Lagabreytingar
5. Ákvörðun um félagsgjöld 2021
6. Kosning stjórnar og endurskoðenda
7. Önnur mál

Tillögur að breytingum á lögum félagsins verða lagðar fram til samþykktar á fundinum. Tillögurnar er hægt að skoða á vef Skógræktarfélagsins www.skogmos.is

Að loknum hefðbundnum aðalfundarstörfum mun Brynjólfur Jónsson, framkvæmdastjóri Skógræktarfélags Íslands, halda erindi um stöðu, hlutverk og framtíðarsýn Skógræktarfélags Íslands.

Vegna Covid-19 verða engar veitingar að loknum fundinum. Farið verður eftir 2 m reglunni og verður spritt á staðnum.

Nú er búin að vera veruleg þurrkatíð, með þurru lofti og sólskini sem þurrkar yfirborð jarðar. Í svona tíð er mikil hætta á svarð- og gróðureldum og þarf lítið til, eða eins og segir í laginu „Af litlum neista verður oft mikil bál“, eins og nýjustu fréttir úr Heiðmörk sýna alltof vel.

Því skiptir miklu máli að ganga sérstaklega varlega um:

• Hendið ekki sígarettum/vindlingum á víðavangi (á ekki að gera hvort sem er, en á sérstaklega við nú!).
• Bíðið með grillið/varðeldinn/kamínuna þar til kemur væta og almennt gildir að forðast skal að nota einnota grill og alls ekki setja þau niður á gróið land.
• Látið vita ef þið verðið vör við óábyrga umgengni.

Kynnið ykkur forvarnir og fyrstu viðbrögð – greinargóðar upplýsingar má finna á https://www.grodureldar.is/

Aðalfundur Skógræktarfélags Eyfirðinga verður haldinn á Hótel Kjarnalundi þriðjudaginn 11. maí og hefst hann klukkan 19:30.

Á dagskrá eru venjuleg aðalfundarstörf.

Vegna óvissu um fjöldatakmarkanir eru þátttakendur beðnir um að skrá sig á stjorn@kjarnaskogur.is með nafni, kennitölu og símanúmeri. Einnig hægt að hafa samband í 866-4741.

Fundurinn  á Facebook: https://www.facebook.com/events/373255723934687/

Aðalfundur Skógræktarfélags Borgarfjarðar 2021 verður haldinn að B59- hótelinu í Borgarnesi sunnudaginn 2. maí kl. 14.

Dagskrá:

• Skýrsla fráfarandi formanns og framtíðarsýn. Óskar Guðmundsson.
• Ársreikningar og árgjald. Laufey Hannesdóttir féhirðir.
• Umræður um skýrslu stjórnar og ársreikninga.
• Kosningar og önnur mál.

Stjórn Skógræktarfélags Borgarfjarðar

Skógræktarfélag Hafnarfjarðar býður upp á fuglaskoðun í Höfðaskógi laugardaginn 24. apríl kl. 11-13. Leiðsögumenn eru Hannes Þór Hafsteinsson og Steinar Björgvinsson. Þessi viðburður er í tengslum við bæjarhátíðina Bjarta daga.

Létt ganga um skóginn og nágrenni fyrir alla fjölskylduna. Takið með ykkur sjónauka!

Julia C. Bos ver meistararitgerð sína í náttúru- og umhverfisfræði við deild Náttúru og skógar í Landbúnaðarháskóla Íslands sem nefnist „Effects of afforestation on soil properties, ecosystem C stocks and biodiversity in East Iceland” á ensku („Áhrif nýskógræktar á jarðveg, kolefnisforða og líffræðilega fjölbreytni á Fljótsdalshéraði“).

Leiðbeinendur eru próf. Bjarni Diðrik Sigurðsson og próf. Ólafur Arnalds við Landbúnaðarháskóla Íslands. Prófdómari er dr. Guðmundur Halldórsson, sérfræðingur hjá Landgræðslunni.

Vörnin fer fram þriðjudaginn 23. mars 2021 kl. 13:00 og verður streymt í gegnum Teams fjarfundabúnað. Öllum áhugasömum er velkomið að fylgjast með henni þannig.

Sjá nánar: http://www.lbhi.is/meistaravorn_julia_bos_i_natturu_og_umhverfisfraedi

Sunnudagurinn 21. mars er alþjóðlegur dagur skóga hjá Sameinuðu þjóðunum. Af því tilefni bjóða Skógræktarfélag Íslands og Grasagarður Reykjavíkur upp á fræðslu um vetrarklippingar trjáa og runna. Garðyrkjufræðingarnir Einar Örn Jónsson, Pálína Stefanía Sigurðardóttir og Svanhildur Björk Sigfúsdóttir fjalla um hvaða trjágróður á að snyrta á þessum árstíma, hvernig bera eigi sig að til að viðhalda heilbrigðum og fallegum runnum og trjám og ekki síst hvað á ekki að gera!

Fræðslan hefst við aðalinngang Grasagarðsins kl. 11, sunnudaginn 21. mars. Þátttaka er ókeypis og allir velkomnir en bent er á að þar sem ekki er hægt að tryggja tveggja metra regluna í fræðslunni er grímuskylda.

Skógræktarfélag Íslands, landssamband skógræktarfélaganna, óskar landsmönnum öllum gleðilegra jóla og farsældar á komandi ári.

Við þökkum stuðninginn á liðnu ári og sjáumst hress í skóginum árið 2021!