a8

Jólamarkaðurinn vinsæli við Elliðavatn opnar laugardaginn 29. nóvember og verður opinn allar helgar fram að jólum frá klukkan 11-16. Mikið úrval af íslensku handverki og hönnun.

Dagskráin hefst við hátíðlega athöfn þar sem Skólakór Norðlingaskóla ætlar að gleðja markaðsfólk og gesti með söng sínum kl.11.30 á hlaðinu og jólaljósin á trénu verða tendruð, en tréð í ár er skreytt af Gerði Jónsdóttur.

Á Hlaðinu verða til sölu nýhöggvin íslensk jólatré og þar að auki mikið úrval af tröpputrjánum vinsælu og eldiviður. Í Gamla salnum, Hlöðunni og í litlu Jólahúsunum á torginu verður fjölbreyttur hópur handverksfólks sem kynnir vörur sínar og selur. Kaffistofan verður niðri í Elliðavatnsbænum þar sem fjölskyldan getur fengið sér hressingu í anda jólanna, átt notalega stund, og hlustað á rithöfunda lesa og tónlistarfólk flytja falleg lög.

Rjóðrið er trjálundur rétt við Elliðavatnsbæinn þar sem hægt er að setjast á bekki kringum logandi varðeld. Barnastundin verður þar klukkan 14 og þá kemur barnabókahöfundur og les upp fyrir börnin. Jólasveinar koma í heimsókn á markaðinn, og kíkja líka á börnin í rjóðrinu eftir upplesturinn. Þeir syngja og tralla frá 13.30-15.30.

Hægt verður að fylgjast nánar með dagskrá jólamarkaðarins á fésbókarsíðu markaðarins þegar nær dregur. Einnig verða upplýsingar um verð og fleira tengt jólatrjáasölu og jólamarkaðnum á heimasíðu Skógræktarfélags Reykjavíkur.

Jóla- og tækifæriskort Skógræktarfélags Íslands árið 2014 er komið út. Kortið prýðir mynd eftir Kristínu Arngrímsdóttur og prýðir sú mynd einnig forsíðu 2. heftis Skógræktarritsins 2014.

Sérstök hvatning er á kortinu, þar sem kemur fram að fyrir hvert selt kort gróðursetur félagið eitt tré. Ekkert er prentað inn í kortin, þannig að þau nýtast áfram eftir jól sem afmæliskort, boðsmiðar eða hvað sem fólki dettur í hug.

Kortin eru seld 10 saman í pakka með umslögum á kr. 2.000.

Hægt er að nálgast kortin á skrifstofu Skógræktarfélags Íslands, í Þórunnartúni 6, 2. hæð (næsti inngangur við antikbúðina). Einnig eru til nokkrar gerðir af eldri kortum (sjá hér), á kr. 1.000.

Þá er einnig hægt að panta kortin í síma 551-8150 eða með tölvupósti til skog (hjá) skog.is og fá þau póstsend en þá bætist við póstburðargjald.

Skrifstofa Skógræktarfélags Íslands verður lokuð fimmtudaginn 27. nóvember þar sem allir starfsmenn félagsins verða við vinnu úti í skógi. Skrifstofan opnar aftur á venjulegum tíma föstudaginn 28. nóvember.

Borgartréð 2014 er garðahlynur við Sturluhallir, Laufásvegi 49-51, þar sem Íslenska auglýsingastofan er til húsa. Tréð verður formlega útnefnt við hátíðlega athöfn föstudaginn 21. nóvember. Útnefningin er samstarfsverkefni Reykjavíkurborgar og Skógræktarfélags Reykjavíkur.

Hlynurinn við Sturluhallir var gróðursettur árið 1922 og er 10,2 m.á hæð og 2,02 m í ummál þar sem bolurinn er sverastur, þetta er einhver krónumesti hlynur á landinu. Króna garðahlynsins er yfirleitt regnhlífalöguð hér á landi.
Hlynurinn hefur mikið gildi í ræktun í görðum og opnum svæðum. Viður hans er ljós og meðal annars notaður í parket, húsgögn og hljóðfærasmíð, eins og fiðlur, enda leiðir hann hljóð óvenju vel. Síróp er gert úr vökva hlynsins og er það töluverður iðnaður í Norður-Ameríku.

Börkurinn er grár og sléttur en verður hrufóttur með árunum og þykir mikið augnayndi. Blöðin eru handsepótt og frekar stór og með gulan haustlit. Blóm eru gulgræn í hangandi klösum og vinsæl meðal býflugna. Aldinið er tvær hnotur með samvöxnum vængjum sem minna á þyrluspaða þegar þær svífa til jarðar, í miklum vindi geta fræin ferðast nokkur hundruð metra frá móðurtrénu. Hlynur þolir mengun, salt og vind þegar hann eldist en er viðkvæmur í uppeldi.

Hvergi á landinu er garðahlynurinn jafn algengur og í Reykjavík og verður hann meira áberandi í borgarlandslaginu með hverju árinu sem líður. Flestir stóru hlynir borgarinnar eru rétt að slíta barnsskónum ef miðað er við þann 500 ára aldur sem hann nær.

Borgarstjóri Reykjavíkur, Dagur B. Eggertsson, mun útnefna tréð og tendra ljósin á trénu. Valgeir Guðjónsson flytur lag sitt Tré. Dr. Sturla Friðriksson, eigandi trésins, segir einnig nokkur orð við þetta tilefni, en Sturla ólst upp á Laufásvegi 49 og lék sér mikið í garðinum þar sem tréð stendur.

Opin dagskráin hefst kl. 17 í garði Laufásvegar 49-51.

Skógræktarfélag Reykjavíkur samþykkti á fundi sínum þann 15. október sl. ályktun er varðar samþykkt stjórnar Skógræktarfélags Íslands og skógræktarfélaga á Vestfjörðum um Teigsskóg. Því miður er í ályktun Skógræktarfélags Reykjavíkur hallað réttu máli. Ekki skal hér farið í efnislegar deilur við stjórn Skógræktarfélags Reykjavíkur um Teigsskóg en nauðsynlegt er að leiðrétta rangfærslur sem fram koma í ályktuninni.
Fullyrt er í ályktun Skógræktarfélags Reykjavíkur að undirtektir skógræktarmanna við framkominni tillögu á aðalfundi Skógræktarfélags Íslands hafi verið dræmar. Hið rétta er að miklar umræður spunnust á fundinum um tillöguna og voru fundarmenn ekki á eitt sáttir um hana eins og hún var fram sett. Þótti tillagan nokkuð beinskeytt, auk þess sem fundarmönnum fannst ekki nægjanlega skýrt að skógræktarfélögin á Vestfjörðum stæðu að baki ályktuninni. Tillagan var hins vegar borin fram af stjórn Skógræktarfélags Íslands vegna óska frá aðildarfélögum Skógræktarfélags Íslands á sunnanverðum Vestfjörðum.

Niðurstaða skógræktarnefndar á aðalfundi Skógræktarfélags Íslands var sú að leggja til að vísa tillögunni til stjórnar S.Í. og var það samþykkt á aðalfundinum. Það er því rangt eins og fram kemur í ályktun Skógræktarfélags Reykjavíkur að endanleg tillaga, sem fékk umfjöllun og afgreiðslu í stjórn Skógræktarfélags Íslands, sé í andstöðu við vilja aðalfundar. Þorri fundarmanna var hins vegar þeirrar skoðunar að nauðsynlegt væri að umorða tillöguna, sem síðar var gert, og hún afgreidd af stjórn Skógræktarfélags Íslands með öllum greiddum atkvæðum, eins og áður er getið.

Í meðförum stjórnar Skógræktarfélags Íslands var ályktuninni verulega breitt frá upphaflegri tillögu og að endingu stóðu sjö skógræktarfélög á Vestfjörðum og Skógræktarfélag Íslands að ályktuninni sem samþykkt var á stjórnarfundi Skógræktarfélags Íslands þann 1. október sl.

Ályktunin er því í fullu samræmi við óskir skógræktarfélaganna og neðangreind fullyrðing Skógræktarfélags Reykjavíkur því fullkomlega röng, en þar segir:
Ályktun stjórnar félagsins ( S.Í) er ekki í samræmi við vilja kjörinna fulltrúa skógræktarfélaga í landinu eins og hann birtist á fundi aðalfundar Skógræktarfélags Íslands.

Skógræktarfélag Íslands eru landssamtök 61 skógræktarfélags víðs vegar um land og stjórn Skógræktarfélags Íslands leggur sig fram um að hlusta á þau málefni sem heitast brenna á félagsmönnum og geta orðið skógræktarfélögum og viðkomandi samfélagi til framdráttar. Öflugt starf sjálfboðaliða í skógræktarhreyfingunni er afar mikilvægt, en ekki sjálfgefið. Skógræktarfélag Íslands virðir mismunandi skoðanir og ályktanir einstakra félaga innan vébanda þess. Í því tilviki sem hér er rakið hlustaði stjórn Skógræktarfélag Íslands á raddir skógræktarmanna og fólksins sem býr við erfið samgönguskilyrði á Vestfjörðum og mat það svo að hagsmunir íbúa á svæðinu væru mikilvægari en að lítill hluti, 1% kjarrlendis í Þorskafirði og Teigsskógi, þyrfti að víkja fyrir betri samgöngum á svæðinu.