English website
Jólaskógurinn í Brynjudal

Skógræktarfélag Íslands tekur á móti skipulögðum hópum sem efna til ferða í jólatrjáaskóginn í Brynjudal. Árlega hefur verið tekið á móti fleiri þúsund gestum og mörgum finnst heimsókn í jólaskóginn í Brynjudal vera orðinn ómissandi þáttur í jólahaldinu.

Bókanir:
Tekið er á móti hópum allar helgar fyrir jól í desember. Athugið að bókaður tími er áætlaður komutími í Brynjudal. Mikilvægt er að hver hópur haldi hópinn og komi saman á umsömdum tíma!! Dag- og tímasetning heimsóknar ákvarðast í samráði við Skógræktarfélag Íslands. Um klukkutíma akstur er í Brynjudal frá höfuðborgarsvæðinu.

  jolaskogurinn

Verð:
Sama verð er fyrir öll tré óháð gerð, upp að 3 m, en eftir það tekur listaverð við. Grunnverð 2016 er óbreytt frá fyrra ári, kr. 6.700 á tré.

Hópum er frjálst að koma með eigin veitingar og skemmtiatriði (t.d. jólasveina). Sum fyrirtæki hafa þann háttinn á að bjóða starfsmönnum sínum upp á veitingarnar og ferðina en starfsmennirnir greiða síðan sjálfir fyrir trén. Hjá öðrum fyrirtækjum eru trén, ferðin og allt sem henni fylgir jólagjöf til starfsfólks.

 
Aðstaða á staðnum:

leidtilbrynjudalsUm leið og komið er á staðinn safnast hópurinn saman og fær úthlutað samkomurjóðri. Þar bjóðum við hópinn velkominn og gefum leiðbeiningar um val á trjám, pökkun o.fl. Hópar fá skógarskála til umráða með litlu báli eða samkomurjóður (smærri hópar) ef þannig stendur á. Starfsmenn Skógræktarfélagsins aðstoða við að pakka trjánum í net.

Skógurinn er allur opinn og velur hver sér það tré sem passar í stofuna og fellur að smekk. Athugið að trén virðast stækka þegar heim er komið! Mest úrval er af stafafuru, sitkagreni og rauðgreni, en einnig finnast stöku tré af blágreni og fjallaþin.

Hollráð:
Við mælum eindregið með því að sem flestir komi á rútu, enda eflir það hópandann, dregur úr mengun og veldur síður vandræðum á bílastæðum. Ekki er ráðlegt að koma á öðrum fjölskyldubílum en jeppum og jepplingum og í vetrarfæri eru góð vetrardekk nauðsynleg, því það getur verið bæði hálka og hvassviðri á leiðinni og færð misjöfn. Þeir sem koma á einkabílum eru beðnir um að leggja upp frá sama stað á sama tíma og koma sem einn samhentur hópur, en þannig er best að taka vel á móti hópnum.

Mamma segir:
Nauðsynlegt er að koma vel búinn til útivistar og skógargöngu á kaldasta tíma ársins. Ullarnærföt (eða „ullfrotte“) innst klæða og hlýtt millilag, ásamt góðum skjólfatnaði, er nauðsyn. Forðist föt sem eru að miklu leyti úr bómull. Góðir gönguskór og hlýir sokkar (ullarsokkar) eru gulls ígildi. Þá er bara að minna á húfu og vettlinga. Best er líka að taka með sér sög. Ef komið er á rútu getur verið ágætt að hafa með sér merkimiða til að merkja sitt tré.
 

ATH! GSM samband rofnar við Þrándarstaði í Brynjudal.

Nánari upplýsingar í síma 551-8150 eða á netfanginu rf(hjá)skog.is