English website
Landgræðsluskógar

Landgræðsluskógar eru umfangsmesta skógræktar- og uppgræðsluverkefni skógræktarfélaganna. Á vegum verkefnisins hafa skógræktarfélögin séð um gróðursetningu á um 1 milljón trjáplantna árlega allt frá árinu 1990. Lætur nærri að gróðursett hafi verið í um 400-500 ha lands árlega. Ræktunarsvæði Landgræðsluskóga eru víðsvegar á landinu og eru nú yfir 130 samningsbundin svæði.

Fjölbreytni svæðanna er mikil og eru sum þeirra þar sem skilyrði eru hvað best til skógræktar í landinu, á meðan önnur eru þar sem skilyrði eru mjög erfið, t.d. út við ströndina. Öll svæðin eiga það þó sameiginlegt, að þar er stefnt að því að koma upp vöxtulegum gróðri, græða land og auðga.

Samstarfsaðilar skógræktarfélaganna í Landgræðsluskógum eru Landgræðsla ríkisins, Skógrækt ríkisins og Umhverfis- og auðlindaráðuneytið.

Svæðin eru öll opin almenningi og eru mörg hver orðin ákjósanleg til gönguferða og útivistar.