English website
BRESKA-KÓLUMBÍA 2017
Mánudagur, 16. janúar 2017 10:05

Skógræktarfélag Íslands hefur um áraraðir staðið fyrir fræðsluferðum á erlenda grund. Ferð ársins 2017 er til Bresku-Kólumbíu í Kanada.

Ferðin verður farin dagana 9. – 21. september. Hefst ferðin á beinu flugi til Edmonton í Alberta-fylki þann 9. september. Á sléttunum í Alberta verður meðal annars bærinn Markerville heimsóttur, en þar bjó skáldið Stephan G. Stephansson. Frá Edmonton verður svo haldið upp í Klettafjöllin til Bresku-Kólumbíu og Banff og Jasper þjóðgarðarnir heimsóttir, en þar mun gefast frjáls tími til að skoða sig um. Frá þjóðgörðunum er svo stefnan tekin til Vancouver borgar, um fallegar fjallaleiðir, en á leiðinni verða meðal annars heimsóttir frægarðar í bænum Vernon. Eftir stutt stopp í nágrenni Vancouver verður haldið til Vancouver Island eyjunnar. Þar verður meðal annars höfuðborg Bresku-Kólumbíu, Victoria, heimsótt, auk skógarsafns og hins heimsfræga skrúðgarðs, Butchart Gardens. Frá Victoria verður svo haldið aftur til meginlandsins og flogið beint heim frá Vancouver síðdegis þann 20. september og lent að morgni 21. september í Keflavík.

ATH! UPPSELT ER Í FERÐINA!

Verð á mann í tvíbýli er kr. 314.800 fyrir félagsmenn í skógræktarfélögum, en kr. 319.800 fyrir aðra. Aukagjald fyrir einbýli er kr. 99.500.

Innifalið í ferð: Flug með sköttum (Icelandair), akstur með rútu, hótelgisting með morgunverði, heimsókn á vísundabúgarð, ferjur til og frá Vancouver Island, aðgangur að Butchart Gardens og íslensk fararstjórn.

Staðfestingargjald er kr. 45.000 á mann og greiðist við bókun. Bókanir eru hjá Bændaferðum. Þeir sem eru með netfang og kreditkort geta bókað á vefnum: https://www.baendaferdir.is/baendaferdir/detail/312/klettafjollin-i-kanada-vesturstrondin-skograektarfelagid. ATH! Í bókunarformi á vef er gert ráð fyrir að þeir sem ætli að vera saman í herbergi bóki sig saman og greiði eina staðfestingargreiðslu fyrir báða. Einnig er hægt að hringja á skrifstofu Bændaferða, s. 570-2790 eða senda tölvupóst á bokun@baendaferdir.is

Í þessa ferð okkar, líkt og aðrar, gildir að fyrstur kemur, fyrstur fær. Kanada fagnar 150 ára afmæli nú í ár og er haldið upp á það með ýmsu móti. Ein afleiðing þess er að mun fleiri sækja þjóðgarðana heim en ella, sem þýðir aftur að gisting er mjög takmörkuð í og við garðana. Er því takmarkaður sætafjöldi í ferðina og enginn möguleiki á að bæta við sætum.