Á þessari síðu er kynnt þverfaglegt rannsóknaverkefni sem fjallar um mat á þjónustu sem vistkerfi veita samfélaginu.

Náttúra og umhverfi veita margvíslega þjónustu, þjónustu sem rannsaka má á hagrænan hátt og fá þannig fram verðgildi einstakra þjónustuþátta. Þessa þjónustuþætti er hægt að meta sameiginlega þegar nýtingarstefna er mótuð fyrir ákveðin svæði.

Skortur á hagrænu mati á fjölþættri þjónustu náttúrunnar leiðir oft til þess að ákvarðanir eru teknar einungis á forsendum um hagnað af beinni nýtingu auðlinda, en ekkert tillit tekið til fjölþættra annarra verðmæta sem spillast við þá nýtingu.

Heiðmörk í Reykjavík og Garðabæ er tekið fyrir sem rannsóknavettvangur, enda fjölbreytt vistkerfi sem veitir margvíslega þjónustu.

Verkefnið er unnið af sérfræðingum rannsóknastofnananna og meistaranemum í Umhverfis- og auðlindafræði við HÍ á næstu 3 árum. Niðurstöðunnar munu leiða í ljós verðmæti einstakra þjónustuþátta svæðisins og draga fram beint peningalegt virði Heiðmerkur. Slíkar rannsóknir hafa ekki verið gerðar á Íslandi fyrr.